2Cor 13 | ZomZIV | STEP | Hih in note kianga kong hawh a thumveina ding ahi hi. “Thu khempeuh teci nih ahikeh thum theihpihna tawh kipsak ding ahi hi”

2 Corinthians 13

A Nunungpen Vauhilhna

1 Hih in note kianga kong hawh a thumveina ding ahi hi. “Thu khempeuh teci nih ahikeh thum theihpihna tawh kipsak ding ahi hi” ^{▼▼13.1 Tp. 19:15} 2 Note kianga a nihveina kong hawh lai-in vauhilhna kong pia khin zo hi. Ka om loh kala mah, tu-in kong gen kikinah: Kong kileh kik ciangin a beisa huna a mawhte ahikeh adangte kuamah ka dawm kei ding hi. 3 Tua in, Christ in kei tungtawnin thu gen ahi hiam, cih a kitelna na kalh sese hang uh ahi hi. Note hong thazawh dingin amah thanem lo a, note lakah vanglian hi. 4 Ahang in, a taktakin ama thenemna ah kikilhlum napi Pasian vangliatna hangin a nungta hi. Tua mah tawh kibangin ama sungah kote thanem napi note nasem dingin Pasian vangliatna hangin amah tawh ka nungta ding uh hi. ^b

5 Upna sungah na om uh hiam, no le no kisittel ciat un; no le no kizia-et un. Na kizia-et uh ciangin cing zo lo na hi kei buang uh leh Christ no sungah a ten lam thei lo na hi uh hiam? 6 Kote tua zia-etna ah cing zo ka hilam uh hong thei dingin kong muang hi. 7 Khialhna bangmah na bawl loh nadingun, tu-in Pasian tungah thu ka ngen uh hi. Zia-etna ah kote cing ka hina uh mite theih ding deihna hi loin, zia-etna ah cing zo lo banga ka kilat uh hangin note amaan-a na gamtat ding uh deihna hizaw hi. 8 Ahang in, kote in thutak langdoin bangmah ka hih thei kei uh hi; thumaan lam bekah ka pang uh hi. 9 Kote ka thanem laitakun note na thakhauh manun ka nuam uh hi; na kicinkim nadingun thu ka ngen uh hi. 10 Kong pai cianga phelkhiat nading hi lo, note lamtoh nadinga Topa hong piak thuneihna ka khauh zat luat loh nadingin ka om loh kala hih bang teng hong gelh ka hi hi. ^c

A Nunung Hopihnate

11 A nunung penin sanggamte aw, mangpha na man un. Kicinkimna na tum unla, kong ngetna na ngai un. Lungsim kikhatin na kilem un. Itna le lemna Pasian in note hong ompih ding hi. ^d

12 Kinapna siangtho tawh khat le khat na kihopih un. 13 Misiangte khempeuh in hong hopih uh hi.

14 Topa Jesu Christ hehpihna, Pasian itna le Kha Siangtho kithuahpihna note khempeuh tawh omkhawm ta hen.